ORANG-orang se-érté di kampung Bang Jali sontak héboh. Gara-garanya, Mpok Minah, bini Bang Jali, disebut-sebut jadi anggota ISIS. Malahan ada yang bilang, Mpok Minah salah satu pentolan ISIS.
Satu per satu tetangga Bang Jali pun nyatronin rumah Bang Jali. Meréka kepéngén tau apa bener Mpok Minah jadi orang ISIS? Dalam waktu beberapa menit, rumah Bang Jali pun jadi ramé kaya’ pasar.
Si Jéki, anak muda yang juga dikenal aktifis kampung dateng paling dulu. Abis itu berérod di belakangnya ada Matnur, Saadi, Mpok Salmah, Mpok Juleha, Mpok Kokom, Mpok Nana. Ada juga bocah ingusan kagak mau ngalah, Saprul, Apung, Aming.
“Mpok Minaaaah!” teréak si Jéki sonder ngucap salam likum.
Bang Jali sama si Nunung yang nongol. “Lu gila Jék?” Bang Jali langsung melotot. “Ada apa lu manggil-manggil bini gua kaya’ orang kesurupan?”
“Maaf ni, Bang Jali. Saya mau tau, apa bener bini abang jadi anggota ISIS?”
“Iyé! Bener kagak tuh?” Mpok Kokom nyamber.
“Keblinger kali tu Mpok Minah! Ikut-ikutan organisasi yang kagak puguh lagu?” Mpok Salmah nyelak.
“Dibayar berapa tu si Minah paké ikut-ikutan gituan?” Bang Matnur nyusul.
Bang Jali garuk-garuk kepala. “Panggil nyak lu sono!” Bang Jali nyuruh Nunung manggil Mpok Minah yang lagi begusekan di kamar mandi nyuci sepréi yang diompolin cucunya, si Masyitoh, yang semalem nginep di rumahnya.
Mpok Minah kagét juga begitu ngeliat rumahnya jadi ramé kagak biasanya.
“Ada apa ni, Bang?”
“Ada apa…ada apa? Tu lu tanya orang-orang?” Bang Jali ngedorong bininya maju ke depan.
Orang-orang pun ramai-ramai kembali berebutan ngomong. Nadanya menghujat Mpok Minah.
“Udah? Udah?” Mpok Minah kemudian nenangin warga.
“émang iya gua sekarang ketua ISIS. Elu-elu padé, yang perempuan, kalu mau jadi anggota juga boléh banget….”
Orang-orang pun ramai-ramai lagi berebutan ngomong.
“Lu pada tau kagak artinya ISIS?” Mpok Minah nyanya lagi setelah suara-suara ramé tu reda.
“Ya tau-lah. Itu pan organisasi Islam radikal nyang asalnya dari Irak ama Suriah sono, Mpok!” Mpok Kokom bertulak pinggang.
Mpok Minah ngakak. Orang-orang pada saling pandang.
“Lu padé salah. ISIS itu Istri Soleha Idaman Suami. Nah, yang padé mau jadi anggota silakan ngedaftar ama si Nunung!”
“Apa, Mpok?” Mpok Salmah roman-romannya kurang jelas.
“ISIS itu Istri Soleha Idaman Suami! Jelas?”
“Haaaaah?” tamu-tamu kagak diundang Bang Jali itu cuman bisa melongo. Terus bubar atu-atu.
“Matnur!” Bang Jali manggil Bang Matnur. “Jangan lupa bini lu suruh ngedaftar! Jangan cuman demen ngaji, rérod sana rérod sini tapi sembahyangnya kagak!” (090814)
Ilustrasi: Rumah Betawi (Foto: www.rumahideal.org)
