BANG Jali menemukan Mpok Minah lagi marah-marah kagak puguh lagu waktu dia baru pulang dari suatu tempat. Mpok Minah nampak siap pergi ke suatu tempat. Dandanannya rapi.
“Ada apa sih ini?”
“Si Nunung émang keliwatan, Bang.”
“Keliwatan pegimana?”
“‘Ntu, Bang. Masa’ bedak aya di lemari kagak ada.”
“Bedak? Cuman kagak ada bedak doang elu kok segitu raménya?”
“Abang pegimana sih? Bedak pan penting, Bang. Bakal molés pipi aya biar keliatan rada licinan dikit.”
“émang lu mao ke mana?”
“Mao ke pengajian, Bang.”
“Terus hubungannya ama si Nunung apa?”
“Aya yakin bedak aya dibawa si Nunung, Bang. Ditaro di pangkéngnya sendiri.”
“Tinggal lu ambil aja. Apa susahnya?”
“‘Ntu dia, Bang. Si Nunungnya kagak ada. Pangkéngnya dikunci. Aya punya mao, kalo émang dia mao maké bedak aya, paké aja, kagak usah dibawa-bawa ke pangkéng dia. Kan semuanya jadi répot, Bang….”
“Udah lu SMS si Nunung?”
“Udah. Kagak dijawab-jawab.”
“Jadi gimana?”
“Aya kagak jadi dah ke pengajian, Bang. Malu kagak paké bedak…”
“Bujug bunéng, cuman kagak paké bedak terus pergi ngaji sampé batal?”
“Ya pan malu, Bang. Masa’ cuman bedak aja aya kagak punya. Lagian, kalo muka aya kagak paké bedak pan kagak énak, Bang. Mlosnong banget…Kagak kaya’ orang-orang. Bedaknya mahal-mahal, Bang. Mukanya licin. Laler aja bisa kepelését kalo némplok di mukanya…”
Bang Jali, seperti biasa, mésem-mésem.
“Meréka pan emang perlu paké bedak buat nutupin kejelékan meréka, Minah. Kalo elu pan udah cakep dari sononya…”
“Au ah…”
“Lagian elu mah gitu sih…”
“Gitu gimana, Bang?”
“Kalo mao ke mana-mana elu répot nyari bedak. Tapi, kalo di rumah lu kagak pernah paké bedak. Padahal kata Nabi, bini itu kudu bisa ngebikin lakinya senang kalo pas ngeliat…”
“Abang jangan nyari gara-gara dah…”
“Maksud lu?”
“Aya pan tau, kagak paké bedak aja abang kaya’ ayam jago ngeliat ayam wadon, nyerédéng terus. Pegimana kalo aya sering paké bedak di rumah? Bisa-bisa abang kagak mingser-mingser di rumah terus….”
“Au ah….” (010913)

Kamus:
Kagak puguh lagu: tak tentu arah; Aya: saya; Pangkéng: kamar; Bujug bunéng: Masya Allah; Mlosnong: polos; Nyerédéng: mendesak, mépét; Mingser: tak ke mana-mana.